Во вториот квартал од 2026 година, Европската Унија забележа трговски дефицит од 21,8 милијарди евра, со оглед на тоа што увозот на стоки од земји надвор од ЕУ (701,8 милијарди евра) го надмина извозот (680,0 милијарди евра).
Ова е прв трговски дефицит регистриран од вториот квартал од 2023 година, кој беше последен во низата дефицити предизвикани од нагло зголемување на трошоците за енергија во периодот од крајот на 2021 година до средината на 2023 година, објави Европскиот завод за статистика – Евростат.
Дефицитот во трговскиот биланс е првенствено резултат на зголемување на дефицитот кај енергетските производи (од -71,3 милијарди евра во првиот квартал од 2026 година на -101,1 милијарди евра во вториот квартал од 2026 година), суровините (од -7,9 милијарди евра на -9,4 милијарди евра) и другите индустриски производи (од -8,3 милијарди евра на -9,1 милијарди евра). Покрај тоа, имаше намалување на вишокот кај машините и возилата (од 24,9 милијарди евра во првиот квартал од 2026 година на 23,2 милијарди евра) и другите стоки (од 11,6 милијарди евра на 9,1 милијарди евра).
Од друга страна, имаше зголемување на вишокот кај хемиските производи (од 47,1 милијарди евра на 54,0 милијарди евра) и храната и пијалоците (од 10,7 милијарди евра на 11,5 милијарди евра).
Севкупно, извозот се зголеми за 5,4 проценти (+34,9 милијарди евра), а увозот за 9,9 проценти (+63,4 милијарди евра) во споредба со претходниот квартал.
Извозот и увозот се во опаѓање од вториот квартал на 2025 година – тренд што запре во првиот квартал на 2026 година. Овие намалувања делумно се припишуваат на тензиите околу царините.