Националната авиокомпанија на Узбекистан ќе ја мери тежината на патниците заедно со рачниот багаж, јавува Телеграф.
Од авиокомпанијата велат дека новите прописи се воведуваат со цел да се зголеми безбедноста при летањето.
Патниците ќе бидат мерени со специјална вага која што ќе ги категоризира според пол и во групи возрасни и деца, а дискрецијата ќе биде загарантирана.
“Според правилата на Меѓународната асоцијација за воздушен транспорт, авиокомпаниите се должни да ја мерат тежината на ризичната група патници заедно со нивниот рачен багаж, за да се осигура безбедноста на летот” велат од Uzbekistan Airways.
Сепак од Асоцијацијата ги негираат овие тврдења и велат дека не се запознаени со такви прописи.
Во светот има многу малку држави чии авиокомпании покрај багажот ја мерат и тежината на патнците.
Една од нив е Самоа, каде прекумерната дебелина е во загрижувачки размери, па затоа националната авиокомпанија воведе екстра големи седишта во авионите.
