Во 2019 година во Грција имало над 3 милиони пристигнувања од Македонија, лани само 503.894

80

Од над три милиони пристигнувања во 2019 година по копнен пат од Северна Македонија во Грција, лани, поради пандемијата и затворените граници, бројот се намалил на 500.000, односно регистриран е пад од 84,5 %, согласно податоците од Институтот на Здружението на грчки туристички бизниси (ИНСЕТЕ), јави дописничката на МИА од Атина.

 

Поконкретно, во 2019 година, биле регистрирани вкупно 3.250.120 пристигнувања по копнен пат од Северна Македонија во Грција, наспроти 503.894 лани, од кои 311.706 пристигнувања се во првите два месец од 2020 година, односно периодот пред почетокот на пандемијата.

Во јануари регистрирани биле 149.020 пристигнувања, за 90,8 % повеќе од истиот месец во 2019 година, во февруари 162.686, речиси на исто ниво како и една година претходно, а падот започнува од месец март, по воведените први рестрикции, по што следат два месеци кога границите целосно беа затворени.

По отворањето и тоа само на одредени граничните премини, влезот во Грција беше забранет за државјани на трети земји, одлука што сè уште е во сила, па така во летните месеци, односно во периодот од јуни до септември, регистриран е пад од 94,5 до 97,6 % на пристигнувањата по копнен пат од Северна Македонија.

“Во периодот јануари-декември 2020 година регистрирано е намалување од сите соседни земји. Конкретно, најголемото намалување на апсолутните разлики го бележи Бугарија -4,7 милиони / 77,6%, додека најголемото намалување на процентуалните разлики го бележи Северна Македонија -2,7 милиони / 84,5 %. Намалувањето од Албанија изнесува -1,4 илјади / 72,7 %, а од Турција на -849 илјади / 78,1 %, пишува во извештајот со статистичките податоци од Институтот на Здружението на грчки туристички бизниси.

Во однос на општата слика на грчкиот туризам во 2020 година, бројот на патници во Грција се намалил за 76,5 %, односно на 7,37 милиони, од 31,34 милиони една година претходно.

Со меѓународни летови, пристигнувањата биле за 72,5 % намалени, а слична е сликата и во однос на пристигнувањата од странство по копнен пат, каде што има пад за 78,7 %.

Фото: Pixabay