Производната активност во еврозоната, исто така, падна во август, како одраз на остриот пад на побарувачката за индустриски производи, покажа истражувањето на S&P Global.
Индексот на менаџери за набавка (PMI) во индустријата во еврозоната остана во август на јулското ниво кога изнесуваше 45,8 поени, пресметани од Хамбуршката комерцијална банка (HCOB), која ги составува извештаите за истражувачката компанија S&P Global. Вредностите пониски од 50 поени укажуваат на пад на активноста, а вредностите повисоки од 50 укажуваат на нивниот раст.
„Работите одат надолу, и тоа брзо. Производствениот сектор е заглавен во рутина, деловните услови се влошуваат со исто темпо три месеци по ред, протегајќи ја рецесијата на исцрпувачки 26 месеци“, рече главниот економист на HCOB, Сајрус де ла Рубија.
„Новите нарачки, домашни и странски, ослабеа уште повеќе, потиснувајќи ја надежта дека ситуацијата може да се подобри во догледна иднина“, додаде тој.
Индексот што го мери приливот на нови нарачки во август падна за 0,8 поени во однос на јули, на 43,3 поени, што е најниска вредност од декември. Најголем пад од почетокот на годинава забележа и побарувачката од странство.
Продлабочениот пад на побарувачката се совпадна со растот на цените на производителите во Франција, Холандија, Грција и Италија, пренесува Хина.
Ова може да предизвика проблеми за ЕЦБ, која се обидува да го зачува надолниот тренд на цените и се бори со нивниот незапирлив раст во услужниот сектор и смета на нивниот пад во индустријата, објаснува Де ла Рубија.
Според првите проценки на Евростат, објавени на крајот на минатата недела, растот на потрошувачките цени во еврозоната значително забави во август, на 2,2 отсто, што е најниско ниво во последните три години, потсетува Ројтерс.