Според податоците на Државниот завод за статистика, во август 2024 година се издадени 275 одобренија за градење, што е за 20.1 % помалку во однос на истиот месец од претходната година. Во извештајниот период е предвидена изградба на 531 стан, со вкупна корисна површина од 52 648 м2.
Во скопскиот регион најмногу дозволи за градба има издадено општина Гази Баба, вкупно 15. Следуваат Илинден и Чучер Сандево со по седум дозволи, Аеродром со шест, Петровец пет дозволи за градба, Карпош со четири, Студеничани три, Чаир две, Центар и Сарај со по една довола за градба. Во август општините Арачиново, Бутел, Ѓорче Петров, Зелениково, Кисела Вода, Сопиште и Шуто Оризари немаат издадено ниту една дозвола за градење.
Според издадените одобренија за градење, предвидената вредност на објектите изнесува 4 851 654 илјади денари, што е за 31.1 % помалку во однос на истиот месец од претходната година.
Од вкупниот број на издадени одобренија за градење, 165 (60.0 %) се наменети за објекти од високоградба, 45 (16.4 %) за објекти од нискоградба и 65 (23.6 %) за објекти за реконструкција.
Од вкупно 275 објекти, на 167 (60.7 %) како инвеститори се јавуваат физички лица, а на 108 (39.3 %) објекти инвеститори се деловни субјекти.
