Според првата прелиминарна проценка, еврозоната забележа трговски суфицит од 16,8 милијарди евра во декември 2023 година, објави денеска Евростат на својата веб-страница. Во декември еврозоната извезла стоки во остатокот од светот за 218,7 милијарди евра, 8,8 отсто помалку од истиот месец од 2022 година.
Извозот на гориво е намален за 25,4 отсто на годишно ниво, на суровини за 11,4 отсто, на индустриски производи за девет отсто, на машини и транспортна опрема за 7,6 отсто. Декемврискиот увоз на стоки во еврозоната е намален за 18,7 отсто на годишно ниво на 201,9 милијарди евра. Увозот на гориво е намален за 38,3 отсто на годишно ниво, на суровини за 19,6 отсто, на индустриски производи за 12,4 отсто, на машини и транспортна опрема за 9,8 отсто.
Трговскиот суфицит на Европската унија во декември изнесува 15,7 милијарди евра. Речиси сите земји од Европската унија забележаа намалување на увозот и извозот во однос на декември 2022 година. Португалија е единствената земја од ЕУ која забележа годишен раст на извозот, за 0,3 отсто, а најголемо намалување на извозот од 55,5 отсто на годишно ниво е забележано на Кипар.
Данска единствена забележа годишен пораст на увозот, за 0,7 отсто, додека најголемо намалување на увозот од 30,1 отсто на годишно ниво е забележано во Литванија, пренесува Танјуг.