Подземен мега-трезор за супер богати клиенти се гради во Швајцарските Алпи, под планината Бриниг Превој, во близина на градот Лунгерн, објавија швајцарските медиуми.
Проектот за изградба на гигантски комплекс од подземни трезори наменет за заштита на средствата на најбогатите луѓе во светот го управува претприемачот Томас Гасер, претседател на одборот на директори на компанијата „Бриниг Мега Сејф“, објавува „Свис инфо“.
Изградбата на „подземниот сеф за богатите“ е веќе во напредна фаза, а кога објектот ќе биде завршен, пристапот ќе биде ограничен само на избраните, според порталот.
„Прво ќе мора да поминете низ специјална контролна точка и да излезете од возилото. Ќе има неколку нивоа на безбедносни проверки, кои нема да бидат познати на јавноста“, изјави Гасер за швајцарскиот јавен радиодифузен сервис РТС.
На снимателите им беше дозволено да ги снимаат пристапните тунели, но влезот во просторијата каде што ќе бидат трезорите е забранет за јавноста.
Инвеститорите ветуваат највисоко ниво на безбедност во овој објект со околу 20 трезори закопани под 100 метри цврста карпа.
Според инвеститорите, нивото на заштита ќе биде споредливо со она на Швајцарската национална банка, што е доволно ефикасно средство за одвраќање дури и за најсмелите криминалци.
Пазарот за безбедно складирање на вредни предмети доживува светски експоненцијален раст поттикнат од глобалната нестабилност.
„Дубаи долго време се сметаше за безбеден. Денес, тоа чувство на безбедност е доведено во прашање. Луѓето едноставно сакаат да задржат дел од своето богатство“, објаснува Гасер.
Сепак, изнајмувањето на просторот нема да биде достапно за секого и секој трезор-пештера се продава за период од 99 години.
Минималната цена е речиси еден милион швајцарски франци (околу 1,1 милион евра).
„Предноста е што клиентот станува сопственик. Клиентот го има својот број на парцела во катастарот и може да го хипотекира имотот“, додава инвеститорот, кој наведува дека неколку клиенти веќе аплицирале.
Концептот на безбедно складирање длабоко во планините не е сосема нов во Швајцарија.
Во минатото, бројни демилитаризирани воени бункери веќе беа претворени во оклопни трезори или центри за податоци со висока безбедност.
Со проектот во Лунгерн, целта е глобалната елита која сè повеќе сака да ги заштити своите средства од глобалните превирања.