Инвестициската банка Голдман Сакс ја намали прогнозата за економски раст во САД на 3,8 отсто за 2022 година, наведувајќи ги ризиците и неизвесностите поради појавата на сојот омикрон.
Голдман Сакс претходно предвиде раст на американската економија во 2022 година од 4,2 отсто, пренесува Си-ен-ен, и додава дека банката исто така ја намали проценката за економска експанзија за четвртиот квартал од оваа година на 2,9 отсто на годишно ниво, од првично проектираните 3,3 отсто.
Економистот на банката, Џозеф Бригс, оцени дека „омикрон би можел да го забави повторното отворање на економијата, но дека се очекува само скромно забавување на трошоците за услуги“.
„Иако многу прашања се сè уште неодговорени, мислиме дека сега најверојатно е умерено негативно сценарио, според кое вирусот се шири побрзо, а имунолошкиот одговор на оваа тешка болест е само малку ослабен“, наведува економистот.
Недостигот од работници би можел да трае подолго доколку луѓето не се чувствуваат подготвени да се вратат на работа поради овој напор, смета Бригс.
Голдман Сакс посочи дека ширењето на вирусот може да ја влоши ситуацијата со снабдувањето, доколку другите земји воведат построги ограничувања и дека зголемувањето на стапката на вакцинација меѓу странските трговски партнери ќе спречи сериозни нарушувања.
Прогнозата на Голдман Сакс за Соединетите Држави доаѓа откако извршната директорка на Меѓународниот монетарен фонд, Кристалина Георгиева, предупреди дека „ММФ најверојатно ќе ги намали проценките за глобалниот економски раст поради омикрон“, забележува Си-Ен-Ен.