Беркшир Хатавеј, под водство на Ворен Бафет, дополнително го намали својот удел во Банката на Америка (Bank of America), според документите, и заработи повеќе од 10 милијарди долари откако почна да продава акции во јули.
Бафет, кој почна да инвестира во втората по големина американска банка во 2011 година, имаше удел од 13,1 отсто во вредност од околу 45 милијарди долари во јули. Последната серија на продажби го намали тој удел на 10,1 отсто, пренесува Ројтерс.
Продажбата е вознемирувачка за другите акционери на Банката на Америка, во време кога изгледите за банкарската индустрија се неизвесни поради стравувањата од можна рецесија во САД. Од првата продажба на Бафет во јули, акциите на Банката на Америка изгубија речиси седум отсто од својата вредност.
За тоа време, акциите на JPMorgan Chase, најголемата американска банка, пораснаа за 0,5 отсто. Кога еден од водечките американски инвеститори продава, тоа предизвикува загриженост, велат аналитичарите.
Аналитичарите велат дека понатамошната продажба на нејзините акции може да додаде дополнителен притисок врз акциите. Бафет не ги откри причините за продажба на акциите.
