Тројца од четворица Европејци имаат намера да патуваат во наредните шест месеци, а најатрактивни се медитеранските дестинации, покажуваат најновите истражувања.
И покрај војната во Украина и пандемијата која не е завршена, според истражувањето на Европската комисија за патувања, постои желба за патување низ цела Европа.
Сè поголем број Европејци (77 отсто) сакаат да патуваат меѓу април и септември.
Повеќе од половината (56 отсто) од нив планираат да посетат друга европска земја, додека 31 отсто одлучуваат за патувања во рамките на нивните земји.
Најголем оптимизам во однос на патувањето покажуваат испитаниците од Италија, Шпанија, Полска, Велика Британија и Германија (80 отсто). Но, само четвртина од Европејците веќе направиле резервации.
Шпанија е најпопуларна дестинација меѓу Европејците кои планираат да патуваат во странство ова лето, а потоа следуваат Италија, Франција, Грција и Португалија.
Кога станува збор за начинот на одмор, 22 отсто од испитаниците сакаат одмор на сонце и на плажа, одмор во град (15 отсто) и одмор на вода или на брег (15 отсто).
Повеќето Европејци со планови за патување имаат намера да одат на одмор 4-6 ноќевања (33 отсто) или 7-9 ноќевања (27 отсто).
„Нашиот извештај покажува дека довербата на Европејците во патувањето расте сега кога Ковид-19 во голема мера стана дел од нашите животи. Тековниот конфликт во Украина и зголемените трошоци за живот претставуваат предизвици за туристичкиот сектор. Сепак, Европската комисија за патувања е задоволна што гледа дека и покрај овие неизвесности, апетитот за патувања продолжува да расте и европскиот туристички сектор станува отпорен“, изјави Луис Араухо, претседателот на Европската комисија за патувања.
