100-те најголеми светски производители на воена опрема ја зголемија продажбата на оружје за 4,2 отсто во 2023 година на 632 милијарди долари, поттикнати од војните и регионалните тензии, соопшти Стокхолмскиот меѓународен институт за истражување на мирот (СИПРИ).
Во извештајот се вели дека американските групи на листата ја зголемиле продажбата за 2,5 отсто во споредба со претходната година на 317 милијарди долари. Пазарните лидери Lockheed Martin и RTX сепак забележаа нешто помала продажба, пишува Reuters.
Порастот доаѓа по падот од 3,5 отсто на продажбата на оружје во 2022 година, за што СИПРИ ги обвинува недостигот на работна сила, прекините на синџирот на снабдување и зголемените трошоци, што им отежна на многу компании да ја задоволат зголемената побарувачка предизвикана од ситуацијата во Украина.
Европските компании на списокот – со исклучок на Русија – имаа приближно непроменети комбинирани продажби во 2023 година од 133 милијарди долари, но пораснаа нарачките, при што некои групи забележаа пораст на побарувачката поврзана со војната во Украина.
Претходно оваа година, СИПРИ објави седум отсто зголемување на глобалните воени трошоци во 2023 година, најголем годишен пораст од 2009 година.
„Генерално, помалите производители беа поефикасни во одговорот на новата побарувачка поврзана со војните во Газа и Украина, зголемените тензии во Источна Азија и програмите за повторно вооружување на други места“, соопшти СИПРИ.
Руските групи на листата, вклучувајќи ја и државната Ростек, имаа најголем комбиниран раст – 40 отсто, на 26 милијарди долари.
