Касите за самопослужување доживуваат дебакл во САД и Велика Британија. Според извештајот на „Дејли Мејл“, дури шест милиони Британци користат каси за самопослужување за да крадат производи од продавниците.
Истражувањето спроведено од Ipsos на примерок од 1.099 испитаници покажа дека секој осми купувач во Велика Британија намерно избира поевтин артикл од оној што всушност има намера да го купи кога плаќа на касата за самопослужување.
Таканаречениот „банана трик“ е метод кој клиентите го користат за да ја намалат цената на артиклите што ги купуваат. Имено, купувачот намерно носи поевтин артикл, најчесто овошје или зеленчук како банана, наместо вистинскиот, поскап производ што го купува.
Истражувањето покажало и дека речиси половина од испитаниците, поточно 48%, не сметаат дека овој трик треба да биде кривично дело. Освен тоа, осум отсто од испитаниците признале дека краделе производи во вредност до 10 фунти, додека 26 отсто таквото однесување не го сметаат за кривично дело.
13 отсто од испитаниците признале дека краделе производи во вредност од една фунта или помалку, а 47 отсто верувале дека ниту тоа не треба да се третира како кривично дело. Бројките доаѓаат откако кражбите во продавници во Британија достигна рекордно високо ниво со 443.995 пријавени кривични дела во изминатата година, што е 50 кривични дела на секој час.
Британските трговци предупредуваат дека кражбата во продавници индиректно води до повисоки цени за потрошувачите. Со годишна загуба од 1,8 милијарди фунти поради кражба, трговците на мало ги зголемуваат цените на секое купување во просек за околу шест пени за да ги надоместат овие загуби. Дополнително, поради инвестицијата во безбедносни мерки, кои изнесуваат 700 милиони фунти годишно, се зголемуваат и цените на производите.
Многумина го поврзуваат воведувањето на каси за самопослужување со зголемување на кражбите. Во Велика Британија за 50% се зголемил бројот на каси за самопослужување од 53.000 на 80.000. Од друга страна, во САД, поради проблеми со кражби на касите за самопослужување, некои трговци на мало почнуваат да се враќаат на касите со персонал.
„Големите трговци на мало како Target, Walmart и Dollar General строго ги намалуваат или целосно ги елиминираат наплатите за самопослужување. Причина? Кражба! Наводно, клиентите имаат 21 пати поголема веројатност да шверцуваат предмети преку каси за самопослужување отколку каси со персонал“, објави The Guardian уште во февруари оваа година.
Сега, сепак, некои големи британски трговски синџири го следат примерот на продавниците во САД. Morrisons неодамна ја смени својата политика за самопослужување, при што нивниот менаџер призна дека „претерале малку“ со бројот на каси без персонал.
Рами Бајтије, главен извршен директор на компанијата, рече дека тие „ја преиспитуваат рамнотежата помеѓу касите за самопослужување и касите со персонал“ и дека компанијата планира да го намали бројот на каси за самопослужување откако инсталирале премногу.
Ова доаѓа во време на зголемени критики за технологијата. Во ноември, трговецот на мало Booths објави дека ги укинува касите за самопослужување, додека Asda минатата недела објави дека инвестира во персонал наместо во каси за самопослужување.
И покрај ова, повеќето големи супермаркети продолжија да ги воведуваат контроверзните каси за самопослужување и ја проширија нивната употреба во последниве години, надевајќи се дека ќе ја зголемат ефикасноста и ќе ги намалат трошоците.
Сепак, клиентите се повеќе изразуваат фрустрација со овие уреди, а многумина изјавија дека претпочитаат интеракција со персоналот кога плаќаат за нивните купувања.
