Аеродромите во поранешна Југославија, 21 од нив, опслужија вкупно 29.214.323 патници во периодот од јануари до август оваа година. Ова претставува зголемување од 2.174.011 патници, или осум проценти, во споредба со истиот период во 2025 година.
Северна Македонија остана најбрзо растечкиот пазар во регионот на поранешна Југославија, со дополнителни 663.870 патници во текот на првите осум месеци од оваа година. Скопскиот аеродром беше аеродромот со најголем раст во апсолутни бројки, бидејќи опслужи 615.244 патници повеќе отколку во истиот период минатата година.
Аеродромот во Скопje имаше вкупно 2.687.002 патници, што претставува раст од 29,7 проценти.
Охрид, исто така, забележа силни резултати, со 232.423 патници, односно 26,5 проценти повеќе од претходната година. Растот на двата аеродрома беше првенствено стимулиран од значителното проширување на работењето на компанијата „Виз Ер“ во Северна Македонија.
Белград остана најпрометниот аеродром на територијата на поранешна Југославија, со 6.316.012 патници во периодот јануари – август. Ова е за 420.594 патници, или 7,1 процент повеќе во однос на истиот период минатата година.
Загреб беше втор со 3.167.017 патници, додека Приштина беше веднаш зад него со 3.119.584 патници.
Аеродромот во Приштина успеа да го компензира намалувањето на бројот на патници регистрирано во текот на послабата прва половина од годината и до крајот на август се врати во зоната на раст. Патничкиот сообраќај беше за 0,2 проценти поголем отколку во 2025 година. За време на врвот на летната сезона, Приштина имаше повеќе патници од Загреб, но на крајот на август, хрватскиот главен град сè уште одржуваше мала кумулативна предност од 47.433 патници.
Подгорица продолжи да бележи една од највисоките стапки на раст во регионот. Аеродромот во главниот град на Црна Гора опслужи 1.584.195 патници во текот на првите осум месеци, што претставува раст од 30,1 процент, односно дополнителни 366.512 патници.
Август беше особено силен, кога аеродромот во Подгорица имаше 348.628 патници, дури 47,6 проценти повеќе отколку во истиот месец минатата година.
Растот беше поттикнат од базата на „Виз Ер“ со два авиони во Подгорица, која беше отворена во март.
Заедно со Тиват, кој опслужи 1.090.962 патници, црногорските аеродроми имаа повеќе од 2,67 милиони патници во текот на првите осум месеци од оваа година.
Тузла забележа најголем процентен раст меѓу аеродромите на поранешна Југославија, повеќе од двојно зголемувајќи го бројот на патници. Аеродромот опслужи 435.599 патници, што е за околу 101 процент повеќе во однос на истиот период минатата година. Во апсолутни бројки, ова е зголемување од 218.651 патници.
Хрватските аеродроми опслужија малку повеќе од 10,3 милиони патници во периодот јануари – август, што претставува раст од околу 2,1 процент во споредба со минатата година.
Загреб, Дубровник, Задар, Риека и Брач забележаа раст, додека Сплит, Пула и Осиек останаа под нивото од 2025 година.
Резултатите на неколку аеродроми на хрватскиот брег во текот на првата половина од годината беа под влијание на привременото прекинување на домашните летови од јавен интерес, односно линиите со обврска за јавна услуга (PSO) што ги управува „Трејд Ер“.
Суспензијата се случи откако хрватската влада не ја започна навреме тендерската постапка за нов четиригодишен договор за работа на домашни авиокомпании, пренесе Екс Ју Авијација.