Крузерите стануваат сè поголеми од деценија во деценија, но најновиот мега-проект се заканува да ги направи денешните морски џинови изненадувачки мали. Амбициозниот потфат наречен „Брод на слободата“ има за цел да го создаде првиот вистински „град на море“ – пловечка заедница долга 1,6 километри, дизајнирана да прими до 80.000 жители, посетители и членови на екипажот додека непрекинато плови низ светот.
Опремен со училишта, паркови, продавници, хотели, па дури и болница и спортски стадион, овој објект, според неговите креатори, нема да биде обичен крстосувач, туку трајно населена океанска метропола.
Иако денес постојат концепти за „вечно крстарење“, како што е луксузниот брод The World, кој функционира како приватен станбен комплекс за милионери или подостапната Villa Vie Odyssey, и двата проекти сместуваат само неколку стотици патници и изгледаат џуџе од она што го носи Freedom Ship.
Идејата, која првпат се роди кон крајот на деведесеттите години, произлезе од кујната на Freedom Cruise Line International..
Доколку проектот се реализира до крај, бродот ќе биде широк околу 240 метри, ќе тежи 2,3 милиони тони и ќе биде висок дури 30 палуби. Се проценува дека трошоците за изградба ќе изнесуваат неверојатни 12 милијарди фунти (околу 13,87 милијарди евра).
Иако точниот датум на лансирање сè уште не е дефиниран, се планира бродот да работи на нуклеарно гориво. Ќе стане постојан дом за 50.000 жители, ќе биде домаќин на 10.000 привремени посетители, додека за сите нив ќе се грижи екипаж од дури 20.000 луѓе.
Како ќе изгледа „Бродот на слободата“?
Со својот огромен капацитет, овој брод ќе превезува осум пати повеќе луѓе од моментално најголемите патнички бродови во светот („Ѕвездата на морето“ и „Икона на морето“ на „Ројал Карибиан“).
За да се забавуваат и функционираат толку многу луѓе, објектите на бродот мора да бидат монументални:
Спортски стадион со 15.000 седишта
Два музеи, симфониска сала и конгресен центар
Голем воден парк и огромен подводен аквариум за ентузијасти за нуркање
Два луксузни хотели и осум хелиодроми за посетителите
Училишта и колеџи за деца кои живеат постојано на бродот
Внатрешен трамвајски систем за превоз на патници, 24 километри пешачки патеки и над еден хектар зелени паркови.
Кога започнува изградбата?
„Фридом Круз Лајн Интернешнл“, со седиште во Флорида, го довери создавањето на ова визуелно чудо на дизајнерската фирма „Шофер Асошиејтс“, која соработува со водечките светски архитекти и поморски експерти.
Побарувачката и интересот за овој начин на живот се исклучително големи. Менаџментот на компанијата наведува дека интересот на пазарот веќе може да ја оправда изградбата на три вакви брода.
Откако ќе се обезбедат парите, изградбата ќе започне во Индонезија. Се проценува дека самиот процес ќе трае до четири години, а планот е првите станари да се преселат во своите домови на вода додека другите делови од бродот сè уште се градат. Бидејќи нема домашно пристаниште, дури и целосното одржување и ремонт на бродот ќе се врши на отворено море.
Фото:Pixabay