🎥Проект вреден 12,5 милијарди долари: Како ќе изгледа најголемиот аеродром во Африка

Етиопија се подготвува да ги отвори вратите на најголемиот аеродром на африканскиот континент. Аеродромот во Бишофт е дизајниран од британското архитектонско студио „Заха Хадид Архитектис“ и претставува инфраструктурен проект вреден 12,5 милијарди долари.

По завршувањето на првата фаза од работите, аеродромот ќе може да прима 60 милиони патници годишно.

Се наоѓа на 40 километри јужно од главниот град на Етиопија, Адис Абеба, а планираниот капацитет ќе биде четири пати поголем од сегашниот главен аеродром во земјата. Ќе има четири писти и паркинг за 270 авиони. Сето ова ќе го направи аеродромот во Бишофт најголем воздухопловен центар на африканскиот континент.

Завршувањето на првата фаза е планирано за 2030 година.
Завршувањето на првата фаза од работите се очекува во 2030 година и вклучува отворање на терминал со површина од 660.000 квадратни метри и две писти што ќе ги управува „Етиопијан ерлајнс“, кој ќе може да опслужи до 60 милиони патници годишно. По целосното завршување на комплексот, се очекува тој број да биде речиси двојно поголем – 110 милиони патници.

Паркингот и четирите писти ќе бидат изградени околу централниот „’рбет“ на аеродромот, инспирирани од Големата Раседна Долина. Овој распоред го скратува времето и растојанието и го подобрува движењето помеѓу терминалите. Секоја писта ќе има различна палета на бои и уметнички дела инспирирани од пејзажите на Етиопија.

Се очекува да користи природна вентилација, мрежа од соларни панели кои делумно ќе го снабдуваат аеродромот со енергија, како и систем за управување со атмосферските води.

Аеродромот е замислен како целосно интегриран аеродромски град. Планот предвидува хотел во зоната на аеродромот, ресторани, како и надворешни простори исполнети со автохтони растенија, како и брза железничка линија што ќе го поврзува Меѓународниот аеродром Бишофт со аеродромот Боле во Адис Абеба.