Обединетите нации предупредија дека војната во Украина сериозно влијае на нивната способност да ја достават итно потребната храна во земјите ширум светот бидејќи голем дел од неа е заглавена во украинските пристаништа.
„Во моментов, речиси 4,5 милиони тони жито се заглавени во украинските пристаништа и на бродови и не можат да се користат“, изјави директор на Светската програма за храна на ОН (WFP) во Германија, Мартин Фрик.
Извозот на храна е исклучително тежок бидејќи украинските пристаништа и поморските патишта се недостапни поради руската инвазија.
До почетокот на војната, Украина беше еден од најважните производители на пченица и голем производител на пченка. Многу земји зависат од евтината пченица од таа земја.
Житото е исто така клучно за глобалната помош за храна.
„Украинската храна е итно потребна ширум светот“, рече Фрик.
