Организација на потрошувачите на Македонија преку Програмата за заштита на потрошувачите на Град Скопје изработи три брошури во областа на јавните услуги.
Доколку живеете во станбена зграда, сигурно сте соочени со многу предизвици. Најчесто сопствениците на станови кои се вселиле во нова станбена зграда се наоѓаат во дилема дали за одржување на зградата да ангажираат управител (лиценцирана фирма) или да формираат заедница на сопственици која ќе го преземе управувањето со зградата.
Постојат позитивни и негативни искуства кога се во прашање и двете опции. Од една страна, сопствениците кои се определиле за управител, доколку се незадоволни од неговата работа, најчесто не се сигурни дали или на кој начин можат да го раскинат договорот со управителот и да ангажираат друг управител. Од друга страна, пак, постојат случаи кога сопствениците се согласни зградата да ја управува заедница на сопственици, но не ја познаваат постапката за регистрација и начинот на управување со зградата, односно не ги знаат предизвиците кои ваквото управување ги наметнува, стои во брошурата.
Законска обврска е да се постапи на едниот или на другиот начин, односно да се формира заедница на сопственици или, пак, да се ангажира управител на зградата. Сепак, одлуката останува на сопствениците на станови кои треба внимателно да ја проценат состојбата и да ја применат најприфатливата опција, во нивна полза. Во секој случај, треба добро да ги проучат законските одредби.
Работите на управување со зграда може да ги врши управител или заедница на сопственици. Собирот на сопственици треба да одлучи дали управувањето на зградата ќе го врши управител или, пак, за управување ќе биде задолжена заедницата на сопственици, која треба да избере претседател и да се регистрира како правно лице доколку ја врши дејноста на управување со зградата.
Управувањето се врши преку спроведување на одлуките донесени од страна на Собирот на сопствениците на посебните делови во зградата, како и нивно застапување во правниот промет и во постапките пред надлежните органи. Доколку дејностите на управување со станбените згради ја врши управител, должен е да поседува лиценца што ја издава Регулаторната комисија за домување, врз основа на поднесено барање за издавање на лиценца за управител.
Управителот ги има следните права и обврски:
- Ги извршува одлуките на сопствениците на посебните делови;
- Се грижи за редовно одржување и функционирање на заедничките делови;
- Ги застапува сопствениците на посебните делови во работите на управување и во име на одделни сопственици поднесува тужба за ослободување од обврската за плаќање, односно тужба за задолжување за плаќање на трошоците и издатоците на сопственикот на посебниот дел;
- Ги застапува сопствениците на посебните делови пред управните органи во работите на издавање на дозволи и согласности и во постапките за упис на недвижностите и други управни постапки во врска со станбената зграда и земјиштето, како и за други работи поврзани со управувањето;
- Подготвува план за одржување на станбената зграда, план со динамика за спроведување на овој план и се грижи за спроведување на планот;
- Подготвува пресметка на трошоците за управување на станбената зграда и ги распоредува трошоците меѓу сопствениците на посебните делови;
- Ги прима уплатите на сопствениците на посебните делови врз основа на месечна пресметка и ги плаќа обврските од договорите склучени со трети лица;
- Ги информира сопствениците на посебните делови за својата работа и им доставува месечни и годишни пресметки;
- Изготвува годишен извештај за управување со објектот;
- Во согласност со одредбите од законот стопанисува со резервниот фонд;
- Врши набројување и нумерирање на становите и го пријавува уписот на податоците во органот што ги води јавните книги на недвижностите и
- Треба да ги познава стандардите и нормативите за пристапност на лица со хендикеп во станбениот објект.
Фото: Freepik