Американската авиокомпанија Delta потврди дека ја тестирала сателитската интернет мрежа на SpaceX.
Извршниот директор на Delta, Ед Бастиан потврди дека е извршено тестирање на Starlink технологијата, а иако не откри повеќе детали, јасно е дека една од најголемите американски авиокомпании е заинтересирана за сателитската интернет услуга поддржана од SpaceX и нејзиниот основач и директор Илон Маск.
Во јули минатата година SpaceX потврди дека е во разговори со претставници на неколку авиокомпании и дека се обидува да го „финализира производот што ќе се најде во авионите во многу блиска иднина“.
Неколку месеци претходно, SpaceX побара од властите дозвола да ги обезбеди своите услуги за возила во движење, како што се авиони, чамци и камиони. Маск рече дека технологијата е „едноставно преголема“ за патничките автомобили. Американските медиуми пишуваат дека Маск добил дозвола барем за тестирање на технологијата наменета за авиони, но дека е потребна и дозвола за продажба на услугата.
Во SpaceX очекуваат многу од мрежата Starlink, а во случај на интернет достапен во авиони, целта е секој патник да може истовремено да гледа некој стрим. Ова ќе бара поголема брзина на интернет бидејќи Netflix препорачува 5 Mbps за еден пренос од 1.080p.
Во моментов во авионите на Делта е достапен Viasat Wi-Fi, кој исто така го користат авиокомпаниите United и American.
