Производството на електрични возила бара 40 отсто помалку работни места од производството на бензин, иако некои работни места може да се спасат со производство на повеќе делови во компаниите, изјави шефот на американскиот автомобилски гигант Форд.
Потребни се 40 отсто помалку труд за да се направи електричен автомобил, така што деловите мораме да ги правиме сами за да може сите да бидат вклучени во растот, изјави Џим Фарли за Rainbow Push Coalition на авто-конференција во Детроит.
Електричните возила имаат помалку делови од традиционалните. Американскиот синдикат United Auto Workers, кој претставува околу 400.000 работници, наводно проценил во 2018 година дека транзицијата кон електрични возила може да доведе до губење на 35.000 работни места.
Во август, американскиот гигант отпушти 3.000 работници со полно работно време и со привремени договори, тврдејќи дека неговата структура на трошоци не е конкурентна со онаа на другите производители. На крајот на минатата година вработуваше 183.000 работници.
Мораме да започнеме сосема нов синџир на снабдување за батерии, мотори и електроника, со уште поважна улога на диверзификација на изворите на снабдување, нагласи Фарли.
Форд сака да обезбеди половина од светскиот пазар на електрични возила до 2030 година. Во октомври објавија дека ја зголемиле продажбата повеќе од двојно во однос на лани.
Производителите на автомобили моментално ги менуваат синџирите на снабдување и се фокусираат главно на производството на батерии, најважната компонента на електричните возила.
Форд неодамна ги здружи силите со производителот на батерии SK Innovation за да изгради фабрики за батерии во САД. General Motors соработува со LG Chem.
