На Волстрит, берзанските индекси паднаа во понеделникот, бидејќи инвеститорите, веќе загрижени за растот на каматните стапки на американската централна банка, стравуваат од забавување на растот на кинеската економија поради новите ограничувања против Ковид-19.
Dow Jones загуби 0,13 отсто, на 33.700 поени, додека S&P 500 се лизна за 0,39 отсто, на 3.949 поени, а индексот Nasdaq загуби 1,09 отсто, на 11.024 поени.
Инвеститорите беа загрижени за натамошното зголемување на бројот на пациенти со Ковид-19 во Кина, па надежите за брзо опуштање на рестриктивните мерки избледеа.
Во неделата бројот на заразени достигна речиси 27.000, што е највисоко од април, па во Пекинг и во некои други градови властите ги повикаа луѓето да останат дома и ги заострија мерките за влез во градот.
Ова ги поддржа стравувањата од натамошно забавување на и онака бавниот раст на кинеската економија.
„Кина може да воведе нови ограничувања“
„Постојат стравувања дека Кина би можела повторно да воведе некои од ограничувањата за коронавирусот што неодамна почна да ги укинува“, рече Керол Шлајф, директор во семејната канцеларија на БМО.
Дополнително, стивнаа еуфоријата за ублажување на инфлаторните притисоци во САД и забавувањето на каматните стапки од страна на ФЕД.
Се очекува централната банка во декември да ги зголеми каматните стапки за 0,50 процентни поени, по серијата зголемувања за 0,75 поени.
Но, прашање е како ќе се движи инфлацијата во наредните месеци и до кое ниво ФЕД ќе ја зголеми цената на парите.
Како резултат на тоа, инвеститорите се претпазливи, за што сведочи слабиот обем на тргување. Вчера, на пример, на американските берзи се сменија 9,5 милијарди акции, додека просечниот дневен обем во последните 20 дена беше 11,9 милијарди.
Помал обем на тргување се очекува во наредните денови бидејќи се наближуваат четврток и празникот Денот на благодарноста, кој многу инвеститори вообичаено го поврзуваат со викендот.
И на европските берзи вчера паднаа цените на акциите. Лондонски FTSE индексот ослабе за 0,12 отсто, на 7.376 поени, додека франкфуртски DAX се лизна за 0,36 отсто, на 14.379 поени, а париски CAC 0,15 отсто, на 6.634 поени.
