Меѓународниот монетарен фонд (ММФ) во вторникот ги објави своите најслаби среднорочни очекувања за глобален раст во повеќе од 30 години.
Во својата Светска економска перспектива објавена вчера, Меѓународниот монетарен фонд малку ја намали прогнозата за глобалниот раст оваа година, бидејќи зголемувањето на каматните стапки ја намали економската активност и предупреди дека натамошните превирања во финансискиот систем би можеле да го намалат производството на речиси рецесиско ниво.
Според Ројтерс, ММФ сега предвидува раст на глобалниот реален БДП од 2,8 отсто во 2023 година и 3,0 отсто во 2024 година, што е нагло забавување од растот од 3,4 отсто во 2022 година поради заострената монетарна политика.
Покрај тоа, ММФ предвидува глобална инфлација од седум проценти оваа година, што е намалување од 8,7 проценти во 2022 година, но повисока од јануарската прогноза од 6,6 проценти за 2023 година, пренесува АП.
Високата инфлација веројатно ќе ги принуди Федералните резерви и другите централни банки да продолжат да ги зголемуваат стапките и да ги задржат на или во близина на нивниот врв подолго време за да се борат против растот на цените, а зголемените трошоци за задолжување се очекува да го ослабат економскиот раст и потенцијално да ги дестабилизираат банките кои се потпираа на на историски ниски стапки.
Прогнозите на ММФ за САД се малку подобрени, со прогноза за раст за 2023 година од 1,6 отсто, што е повеќе од 1,4 отсто предвидено во јануари.
Од друга страна, ММФ ги намали прогнозите за некои големи економии, вклучително и Германија, која сега се прогнозира да се намали за 0,1 отсто во 2023 година и Јапонија, за која сега се прогнозира раст од 1,3 отсто оваа година, наместо 1,8 отсто.