Според податоците на веб-страницата OilPrice во саботата наутро, цената на нафтата брент изнесува 93,93 долари за барел, додека нафтата од Тексас WTI, репер за американскиот пазар, изнесува 90,77 долари.
На лондонскиот пазар цената на барел нафта во петокот беше речиси непроменета во однос на четвртокот и изнесуваше 93,78 долари, пренесува SEEbiz.
Расположението на пазарот оваа недела го одбележа одлуката на Саудиска Арабија и Русија да го продолжат периодот на намаленото производство до крајот на годината. Водечките извозници до јануари ќе ги намалат испораките за вкупно 1,3 милиони барели дневно.
Организацијата на земјите извознички на нафта и нејзините сојузници претходно го одложија рокот за договор за намалување на испораките до крајот на следната година.
Инвеститорите беа охрабрени и од малото слабеење на базичната инфлација во САД во август, бидејќи тоа може да ја поттикне централната банка повторно да паузира во циклусот на зголемување на каматните стапки.
Европската централна банка (ЕЦБ) повторно ги зголеми во четвртокот, но сигнализираше дека циклусот на затегнување на монетарната политика во еврозоната може да се ближи кон крајот, со оглед на пригушената побарувачка и послаб раст на економската активност.
Во петокот, пак, ЕЦБ најави можност за зголемување на каматните стапки доколку се забрза растот на цените. Новите проценки предвидуваат побавен раст на цените во наредните години и приближување на општата и основната инфлација на целта од два отсто во 2025 година.