Првиот BMW iX2 дебитира заедно со втората генерација на X2, благодарение на што сега купувачите добиваат опција и за целосно електричен погон, покрај верзиите со внатрешно согорување
Со лансирањето на новиот X2, BMW ја претстави и првата целосно електрична варијанта – iX2. Електричниот SUV ќе дебитира во март 2024 година како iX2 xDrive30, и ќе се произведува заедно со конвенционалниот X2 фабриката на BMW во Регенсбург, Германија.
Визуелно, новиот X2 е доста поинаков од моделот во заминување, иако стилските разлики помеѓу X2 и iX2 се прилично мали. Има многу слични предни и задни елементи како моделите со внатрешно согорување, но очигледно има лажни решетки и нема никакви издувни цевки. Сепак, под површината се направени најсуштинските промени.
iX2 првично ќе биде достапен исклучиво како xDrive30. Овој модел комбинира електричен мотор на предната оска со еден на задната оска за да испорача комбинирани 313 КС и 494 Nm вртежен момент. За напојувањето на овие мотори е задолжен пакетот батерии од 64,8 kWh и иако не е SUV фокусиран на перформансите, iX2 xDrive30 сепак може да забрза до 100 км/ч за импресивни 5,6 секунди и да достигне максимална брзина од 180 километри на час. Има опсег на движење помеѓу 417 км и 449 км.
Стандардно, iX2 xDrive30 е поставен на специјални 17-инчни тркала од лесна легура и вклучува регенеративен систем за сопирање. Дополнително се разликува од моделите со согорување поради присуството на зајакнати вкрстени елементи за предниот и задниот браник кои се дизајнирани да помогнат во заштитата на батеријата при судар.
Спецификации
BMW го опреми iX2 xDrive30 со својата Combined Charging Unit што овозможува полнење со наизменична струја со брзина од 11 kW како стандард, овозможувајќи му да се полни од 0 до 100% за 6,5 часа. Кога е поврзан со AC полнач од 22 kW, тоа време паѓа на 3 часа и 45 минути. Исто така, iX2 поддржува DC полнач од 130 kW што дополнително го намалува времето на полнење, овозможувајќи батеријата да се наполни од 10-80% за 29 минути. Моделот има и систем за термичко управување за ладење или загревање на батеријата пред возачот да застане на станица за брзо полнење.
Клиентите кои ќе го нарачаат iX2 ќе имаат можност да го купат пакетот „Connected Home Charging“, чија цел е намалување на трошоците за енергија и минимизирање на јаглеродниот отпечаток на теренецот. Овој пакет вклучува полнење оптимизирано за оптоварување, кое ја прилагодува стапката на полнење врз основа на достапната моќност во домот. Понатаму, интелигентно ја користи енергијата генерирана од соларните панели во домаќинството. Целиот систем може практично да се контролира преку апликацијата My BMW.
Преземено од Avtoplus.mk
