Исходот од дводневниот глобален самит за вештачка интелигенција во Обединетото Кралство беше консензус меѓу земјите дека полето на вештачката интелигенција треба да се контролира. Разговорите се придружени со повици за итна акција бидејќи е неопходно да се следи брзиот развој на оваа технологија.
На дводневната конференција, која заврши на имотот Блечли Парк северно од Лондон, меѓу другите присуствуваа и бројни високи политички гости и претставници на технолошки компании.
Генералниот секретар на ОН Антонио Гутереш повика на единствен одговор на опасностите што ги носи вештачката интелигенција. Како што предупреди, постојано го фаќаме развојот на вештачката интелигенција, наместо да бидеме на чело на колоната и да управуваме со неа.
Земјите од Европската унија, членки на групата Г7 на седумте најбогати економии во светот, Австралија, Јужна Кореја и Сингапур, постигнаа договор со водечки компании во областа на вештачката интелигенција, како OpenAI, Anthropic, Google DeepMind и Microsoft, на нов систем за тестирање на безбедноста на оваа технологија, пренесува француската новинска агенција АФП.
Самитот започна во средата, кога 28 земји и ЕУ потпишаа заедничка изјава во која се истакнува потребата од меѓународна соработка во развојот на вештачката интелигенција. Британскиот премиер Риши Сунак го нарече револуционерно. Тој смета дека тоа ќе ја „сврти вагата во корист на човештвото“.
Kако дел од самитот, се сретнаа високи политички претставници, меѓу кои Сунак, американскиот потпретседател Камала Харис и претседателката на Европската комисија Урсула фон Лејен.
На самитот присуствуваа и претставници на технолошки гиганти, меѓу кои и извршниот директор на SpaceX и Tesla Илон Маск. На почетокот на самитот тој предупреди дека вештачката интелигенција е едно од егзистенцијалните прашања.
Гутереш укажа на можните негативни последици од вештачката интелигенција кои можат да влијаат на сите области. „Концентрацијата на вештачката интелигенција во само неколку земји и компании може да ги зголеми геополитичките тензии“, додаде тој.
Тој предупреди и на продлабочувањето на и онака огромната нееднаквост во светот што може да биде предизвикана од неконтролираното развивање на оваа технологија и повика на развој на глобална стратегија во која ќе бидат вклучени сите засегнати страни.
Сунак објави дека канадскиот научник и пионер Јошуа Бенџо ќе го предводи тимот кој ќе го подготви инаугуративниот извештај за безбедноста на вештачката интелигенција.
„Стивен Хокинг еднаш рече дека вештачката интелигенција веројатно ќе биде најлошото или најдоброто нешто што ќе му се случи на човештвото. Убеден сум дека може да биде второто ако ја продолжиме соработката од изминатите два дена“, изјави Сунак по самитот.
