Новите бензински автомобили имале продажен удел од 33,4% на пазарот на ЕУ во октомври, а веднаш по нив следат хибридите со удел од 28,6%
Инфлациските притисоци направија проблем за голем број потрошувачи, но податоците од европскиот пазар откриваат дека регистрациите на нови автомобили забележале скок петнаесетти месец по ред во октомври и продажбата на нови автомобили не покажува знаци на забавување.
Податоците објавени од Европската асоцијација на производители на автомобили (ACEA) откриваат дека регистрациите на нови автомобили скокнале за 14,6% на 855.484 единици низ Европската унија минатиот месец. Ова го следи силниот 12-месечен тренд на растечката побарувачка и во првите 10 месеци од 2023 година, регистрациите на нови автомобили низ целиот регион се зголемени за 16,7%, со вкупно речиси девет милиони возила.
Побарувачката за нови возила се покажа како особено силна во Италија (+20,4%), Шпанија (+18,5%), Франција (+16,5%) и Германија (+13,5%), а Унгарија е единствената земја во ЕУ која не забележа зголемување на регистрации на нови автомобили во периодот јануари-октомври.
Хибридите веднаш зад бензинците
Електрификуваните возила се покажуваат како особено популарни низ целиот континент. Додека автомобилите на бензин сочинуваат 33,4% од возилата регистрирани во октомври, хибридите не заостануваат со 28,6% удел на пазарот. По нив следуваат батериски електрични возила со удел од 14,2%, дизел моделите со удел од 12% и плаг-ин хибридите со удел од 8,4% од пазарот.
Октомври се покажа како особено силен месец за продажба на хибриди и батериски електрични возила. Всушност, регистрациите на ЕВ во ЕУ пораснаа за 36,3% во текот на месецот, достигнувајќи 121.808 единици, додека регистрациите на нови хибридни автомобили се зголемија за 38,6%. Побарувачката за ЕВ се зголеми особено брзо во Белгија (+147,3%) и Данска (+100,7%), додека продажбата на хибриди се зголеми за 57,9% во Германија, 40,1% во Франција и 28% во Италија.
Податоците на ACEA, исто така, откриваат дека пазарот на бензински автомобили во Европската унија се зголеми за 8,1% во октомври, пред се поради зголемувањето на продажбата во Италија, Франција, Шпанија и Германија. Истото не може да се каже за дизел автомобилите со пад на побарувачката за 13,2% во октомври, предводена од пад од 29,4% во Франција и пад од 20,2% во Шпанија.
Преземено од Avtoplus.mk
