На Волстрит, берзанските индекси беа главно непроменети во четвртокот, бидејќи инвеститорите решија да се одморат од силниот раст на цените на акциите во последните месеци.
Dow Jones зајакна 0,14 отсто, на 37.710 поени, додека S&P 500 порасна за 0,04 отсто, на 4.783 поени. Индексот Nasdaq ослабе, пак, за 0,03 отсто, на 15.095 поени.
Во мирно тргување, Dow Jones достигна ново рекордно ниво, додека S&P 500 се приближи до рекордното ниво за само 0,3 проценти.
Сите најважни индекси остварија големи добивки во изминатиот месец, квартал, па дури и цела година.
Тоа е благодарение на постепеното ублажување на инфлацијата и забавувањето на економскиот раст. Ова е причината зошто американската централна банка најверојатно го заврши циклусот на зголемување на каматните стапки, па следната година ќе следи намалување на каматите.
Пазарот е поддржан и од уверувањето на инвеститорите дека и покрај агресивното зголемување на каматните стапки во последните години, економијата ќе избегне рецесија.
Благодарение на силниот раст на цените на акциите во изминатите девет недели, S&P 500 е на дофат на највисокото ниво на сите времиња.
„Ова е еден од најголемите пазарни скокови на крајот на годината, а започна уште пред пораките на ФЕД во средината на декември во врска со каматните стапки и инфлацијата. Тоа покажува колку далеку сме стигнале од дното на пазарот „мечки“ минатата година и ги потсетува инвеститорите дека после темните облаци секогаш доаѓа сонце“, рече Рајан Детрик, стратег во Carson Group.
И на европските берзи цените на акциите вчера благо паднаа. Лондонскиот FTSE индекс ослабе за 0,03 отсто, на 7.722 поени, додека франкфуртски DAX се лизна за 0,24 отсто, на 16.701 поен, а париски CAC 0,48 отсто, на 4.535 поени.