Кризата во градежниот сектор во Германија е на нов врв. Цените на речиси сите материјали се повисоки од пред енергетската криза. Фирмите од индустријата за изградба на станови изгледаат мрачно на иднината, со поголем песимизам од кога било досега, според истражувањето на институтот Ифо.
Во февруари индикаторот Ифо за компаниите специјализирани за изградба на станови падна на минус 61,9 поени, од минус 60,7 претходниот месец.
„Домувањето никаде во моментот не гледа трошка надеж“, рече во четвртокот Клаус Волраб, раководител на истражување на институтот во Минхен. Многу компании, додаде, се жалат не само што нема нови вработувања, туку и дека се откажуваат стари договори.
Градежните работи последниве две години поскапеа прилично поради скокот на цените на кредитите и трошоците за изградба. Затоа компаниите и приватните инвеститори многу проекти ставија во мирување или ги откажаа.
Индексот за деловна клима на Ифо се базира на месечно истражување на компаниите.
Цените на градежните материјали генерално продолжија да растат минатата година, без оглед на намалувањето на цената на дрвото или челикот, покажуваат новите податоци на Федералниот завод за статистика.
Цементот, варот и гипсот поскапеа за над 30 отсто, а свежиот бетон и плочките за речиси четвртина.
