На овогодинешната листа на најиновативни светски компании, американското списание Fast Company за прв пат вклучи хрватска компанија – Infobip. По просејувањето низ илјадници апликации, уредниците и новинарите на Fast Company избраа компании кои поттикнуваат напредок низ целиот свет и низ индустриите – од стартапи во рана фаза до некои од највредните компании во светот.
Овогодинешната листа вклучува компании кои со своите иновации ја обликуваат индустријата и културата, кои поставуваат нови стандарди и забележуваат извонредни достигнувања и пресвртници во сите економски сектори. Покрај главната листа на 50 најиновативни компании во светот, магазинот Fast Company препозна голем број организации (вкупно 606) во 58 различни сектори и региони. Така, Infobip се најде на шестото место меѓу најиновативните компании во областа на автомобилската индустрија, благодарение, како што напиша Fast Company, на трансформацијата на искуството за транспорт и купување автомобили. На второто место на истата листа, на пример, е Мерцедес Бенц, а Инфобип се најде во друштво на Блекбери, кој го зазеде петтото место.
Соработка со бројни брендови
Infobip соработуваше со компании како Uber, Bolt и Cabify за да воведе иновативни модели во автомобилската индустрија и да ја трансформира комуникацијата со клиентите. Еден од последните значајни проекти на Infobip е оној со Uber во Индија, кога разви чет-бот базиран на вештачка интелигенција кој им овозможува на корисниците да нарачуваат возења преку WhatsApp.
Infobip, исто така, соработуваше со брендови како Toyota, Nissan и индискиот Mahindra Auto за да го поедностави продажното искуство за клиентите.
На самиот врв на главната листа на 50 најиновативни компании Fast Company ја стави Nvidia, а потоа следат Novo Nordisk, Microsoft, United Auto Workers, National Women’s Soccer League, Gensler, YouTube, Taco Bell, OpenAI и KinetX. Покрај компаниите кои се занимаваат со вештачка интелигенција, на листата се наоѓаат и компании како Vertex Pharmaceuticals, која го лансираше првиот третман за уредување на гени на пазарот или, на пример, Climeworks чија технологија го фаќа воздухот и го чисти CO2 од атмосферата.
