На Волстрит, S&P 500 се лизна од рекордните нивоа во четвртокот, како и индексот Nasdaq, бидејќи цените на акциите на технолошката компанија паднаа по извештаите за слабеење на инфлацијата во САД.
Индексот Dow Jones зајакна 0,08 отсто, на 39.753 поени, додека S&P 500 падна за 0,88 отсто, на 5.584 поени, а Nasdaq 1,95 отсто, на 18.283 поени.
Така, S&P 500 и Nasdaq, откако достигнаа рекордни нивоа неколку дена по ред, се лизнаа од тие нивоа.
Најголемите технолошки компании ја загубија својата вредност
Падот на индексот уследи по најавата дека јунската инфлација во САД ослабе за 0,1 отсто на месечна основа, со што годишната инфлација достигна 3 отсто, што е најниско ниво во повеќе од три години.
Благодарение на ова, зајакнаа шпекулациите дека американската централна банка ќе ги намали каматните стапки веќе во септември.
И покрај ублажувањето на инфлацијата, големите технолошки компании ја загубија вредноста, вклучувајќи ги Nvidia, Meta Platforms и Amazon.
Цената на акцијата на Tesla потона, пак, за осум отсто, откако Блумберг објави дека Илон Маск го одложил претставувањето на робот-таксито на Tesla од август за октомври.
И додека технолошкиот сектор драстично падна, цените на акциите на помалите компании значително пораснаа.
Акциите на малите компании во пораст
Така, индексот Расел 2000, кој ги опфаќа акциите на малите компании и кој според растот годинава заостанува зад клучните американски берзански индекси, во четвртокот скокна за 3,6 отсто, на највисоко ниво во последните повеќе од три месеци.
Имено, инвеститорите очекуваат дека со намалувањето на каматните стапки ќе се подобри деловното опкружување за помалите компании.
„Мислам дека инвеститорите сега веруваат дека ФЕД е подготвен да започне со намалување на каматните стапки. Така тие велат: „Тоа е доволно добро за мене. Не треба да чекам тие навистина да го направат тоа“, рече Сем Стовал, стратег. во CFRA Research.
И на европските берзи цените на акциите вчера пораснаа. Лондонски FTSE индекс зајакна 0,36 отсто, на 8.223 поени, додека франкфуртски DAX порасна за 0,69 отсто, на 18.534 поени, а париски CAC 0,71 отсто, на 7.267 поени.
