Приходите на Суецкиот канал паднаа за речиси една четвртина во финансиската 2023/2024 година бидејќи некои бродари ги пренасочувале своите бродови околу ‘Рт на Добрата Надеж за да избегнат напади во Црвеното Море.
Во финансиската 2023/2024 година, која заврши во јуни, приходот на Суецкиот канал бил 7,2 милијарди долари, објави шефот на управата Осама Рабие и е помал за 23,4 отсто од 2022/2023 година.
Низ каналот во наведениот период поминале 20.148 бродови, за 22,3 отсто помалку од претходната година, додаде Рабие.
УНКТАД во февруари објави дека транзитот на бродови низ Суецкиот канал во јануари е намален за 42 отсто во споредба со тој, најпрометниот месец во 2023 година, поради честите напади на бродови во Црвеното Море.
Од ноември, јеменското движење Ансар Алах ги напаѓа бродовите поврзани со Израел во Црвеното Море, барајќи прекин на израелските воени операции во окупираниот палестински Појас Газа и испорака на хуманитарна помош за Палестинците.
САД и Велика Британија возвратија со напади врз цели во Јемен, а Европската унија испрати поморска воена мисија во Црвеното Море, нагласувајќи го неговиот „одбранбен карактер“.
Суецкиот канал е клучен извор на девизи за Египет и Каиро ја разгледува можноста за нови работи на негово проширување, изјави шефот на администрацијата на почетокот на март.
Почетното истражување би траело околу 16 месеци и би вклучувало студии за изводливост, влијание врз животната средина и инженерство, како и истражување на почвата и багери, потсетува Хина.
Управата во моментов уредува 10 километри канали за двонасочен сообраќај и проширување и продлабочување на уште 30 километри. Одлуката за работите е донесена пред две години, по приземјувањето на огромниот контејнерски брод „Евер Гивен“, кој го запре сообраќајот шест дена во 2021 година.