Цените на гасот во Европа најверојатно ќе бидат во опсег од 27 до 40 евра за мегават-час оваа зима – сè уште повисоки од нивото пред конфликтот во Украина – поради сезонската побарувачка.
Извршниот директор на ENI, Клаудио Дескалчи, вели дека цените нема да надминат максимални 40 евра за мегават-час оваа зима, иако тешко дека ќе ги достигнат тие нивоа.
Исто така, тој рече дека цените нема да паднат под 27-28 евра за мегават-час, пишува Seebiz.
„Малку е веројатно дека пазарот ќе ги види цените толку ниски како пред 2022 година. Недостасуваат околу 150-160 милијарди кубни метри руски гас и не можеме да се преправаме дека тоа не се случи – тоа се случи“, рече тој, мислејќи на затворањето на повеќето руски гасоводи кон Европа.
„Не завршивме со изнаоѓање алтернатива за рускиот гас, мораме да го завршиме следната зима“, посочи Дескалчи, истакнувајќи дека „сè уште постои проблем со рамнотежата“ меѓу понудата и побарувачката во услови на зголемена побарувачка во Азија.
Русија беше најголемиот поединечен снабдувач на гас во ЕУ – обезбедувајќи околу 155 милијарди кубни метри годишно – пред 2022 година, по што ЕУ постави цел да се откаже од руските фосилни горива до 2027 година.
Според проценките на Монтел, испораките на руски гас и ЛНГ во Европа ќе паднат за 43 отсто во 2023 година на нешто помалку од 50 милијарди кубни метри. Сепак, Европа имаше „добри резерви“, како и дополнителни резерви од Северна Африка, рече Дескалчи.
Алжир станува првиот снабдувач на Италија, а засега американскиот гас сè уште пристигнува, така што надокнадува сè, додаде тој. Во меѓувреме, европските магацини беа исполнети на слично ниво како лани.
