Во годишниот извештај за глобалната распределба на личното богатство (Global Wealth Report 2024), банкарската групација UBS презентираше дел од истражувањето за брзиот раст на доларските милионери на планетата.
Во следните пет години нивниот број дополнително ќе се зголеми, а и покрај очекувањата дека тоа ќе се случи прво во брзорастечките економии и оние кои зависат пред сè од нивните извори на енергија (гас, нафта), првите десет земји ги вклучуваат и развиените економии на Јапонија и Шведска.
Водечка на оваа ранг листа е Тајван, островска земја во повеќегодишен спор со Кина, за која UBS очекува да има повеќе милионери до 2028 година, со раст од 47 проценти. Најзаслужна за ваквиот развој е големата индустрија за чипови, која зема нов замав со производството на полупроводници наменети за обработка на софтвер кој користи вештачка интелигенција.
Сепак, најголем дел од зголемувањето на бројот на милионери во Тајван ќе се случи благодарение на имиграцијата на богатите странци, според UBS.
Иако е голема земја, донекаде е изненадувачки што Турција е позиционирана на второто место. Земјата на границата на Азија и Европа со години се бори со екстремно висока инфлација, но по голема веројатност до 2028 година бројот на милионери ќе се зголеми за 43 отсто.
Најголем број милионери во светот има во Соединетите Американски Држави. На крајот на 2023 година, во најголемата светска економија имаше речиси 5,5 милиони од нив, пишува Visual Capitalist. Но, во САД не се очекува нивен голем раст, напротив – дел од нив (оние кои припаѓаат на повисоко ниво и продолжуваат да ги вложуваат своите средства) набрзина ги префрлаат своите средства во други земји со поповолна даночна политика.
Главната движечка сила зад овој тренд ќе биде скокот во технолошкиот сектор во земјата. Според Светскиот економски форум, Турција е дом на шест компании со еднорог (стартапи вредни над една милијарда долари) – имено Peak Games, Getir, Dream Games, Hepsiburada, Trendiol и Insider.
На трето место е Казахстан, а се верува дека бројот на милионери во таа земја во истиот период ќе се зголеми за 37 отсто.
Сепак, листата на UBS е рангирана според најголем процентен раст, а не по апсолутниот број на нови милионери. Тука влегуваат во игра големината на пазарот и економскиот развој. На пример, Јапонија моментално има 2,8 милиони милионери, а нивниот број ќе скокне на 3,6 милиони до крајот на 2028 година, така што напредокот во оваа азиска земја секако вреди да се истакне.
Од друга страна, како територии од кои се очекува најголем одлив на милионери се издвојуваат и две развиени економии – Холандија (-4,0 отсто) и Обединетото Кралство (-17,0 отсто). Освен рестриктивната даночна политика, како причина се наведува и неизвесната економско-политичка ситуација, особено за ОК.
Овие проекции се совпаѓаат со неодамнешните податоци на консултантската фирма за „инвестициска миграција“ Henley & Partners, која проценува дека дури 10.000 милионери ќе ја напуштат Велика Британија до крајот на 2024 година.
