На Волстрит берзанските индекси во вторникот достигнаа нови рекордни нивоа, благодарение на растот на цените на акциите на технолошките гиганти, а во фокусот на инвеститорите беа записниците од седницата на американската централна банка. Dow Jones зајакна 0,28 отсто, на 44.860 поени, додека S&P 500 порасна за 0,57 отсто, на 6.021 поен, а индексот Nasdaq 0,63 отсто, на 19.174 поени.
Новите рекорди на Dow Jones и S&P 500 индексот најмногу се должат на растот на цените на акциите на технолошките гиганти, како Apple и Microsoft. Инвеститорите се фокусираа на записникот од редовниот состанок на ФЕД во ноември, кога клучните каматни стапки беа намалени за 0,25 процентни поени.
Записникот, меѓу другото, покажа дека челниците на ФЕД немаат исто мислење за тоа колку и во кој период треба дополнително да се намалат каматите. Се заклучува дека тоа ќе зависи од идните економски показатели.
На пазарот и по објавувањето на записникот на ФЕД се проценува дека централната банка дополнително ќе ги намали каматните стапки за 0,25 процентни поени во декември.
Пазарот беше под големо влијание на изјавите на Доналд Трамп
Пазарот вчера го погоди и најавата на новоизбраниот претседател на САД, Доналд Трамп дека на првиот ден во Белата куќа ќе ги зголеми царините за увоз на кинески производи за 10 отсто, а тие на Мексико и Канада за 25 отсто.
Поради ова, под притисок се најдоа акциите на оние компании кои имаат добавувачи од Мексико и Канада, меѓу другите и производители на автомобили. Така цената на акцијата на Џенерал Моторс потона за речиси 9 отсто, а падна и цената на Форд.
А поради стравувањата од зголемување на царините и трговските војни, цените на акциите вчера паднаа на европските берзи. Лондонски FTSE индексот ослабе за 0,40 отсто, на 8.258 поени, додека франкфуртски DAX се лизна за 0,56 отсто, на 19.295 поени, а париски CAC за 0,87 отсто, на 7.194 поени.
