UBS може да се смета за „преголема за Швајцарија“ откако го презеде проблематичниот Credit Suisse, рече поранешниот швајцарски министер за финансии Улрих Уели Маурер, бидејќи мора да се вклучат мерки за намалување на потенцијалните ризици на толку голем ентитет во финансискиот сектор.
„Ако само ги погледнете бројките и го споредите UBS со швајцарската економија, тоа е преголемо“, изјави Маурер за весникот Tages-Anzeiger. „Затоа, ризикот мора да се намали“.
Со околу 1,7 трилиони долари, билансот на УБС е двојно поголем од годишниот економски производ на Швајцарија, што на банката и дава исклучителна тежина во однос на големината на економијата.
Во случај банката да пропадне, нема да има локални ривали кои ќе ја апсорбираат (како во случајот со Credit Suisse), додека цената на национализацијата може сериозно да ги оштети јавните финансии, предупредуваат експертите.
Намалувањето на ризикот беше првенствено одговорност на акционерите преку нивниот избор на членови на одборот, рече Маурер. „Тие треба да преземат одговорност, а не даночните обврзници на крајот“, рече Маурер, кој ја напушти функцијата министер за финансии неколку месеци пред конечниот колапс на Credit Suisse во март 2023 година, пренесува Reuters.
„Мора да се испитаат и законските мерки“, рече Маурер, кој исто така се бранеше откако неодамнешниот парламентарен извештај покрена прашања за неговите постапки додека кризата во Credit Suisse се влоши кон крајот на 2022 година.
