И покрај краткорочниот шок на пазарот, десетте најбогати Американци се збогатија за 365 милијарди долари во последната година, покажува нова анализа на организацијата Оксфам.
Овој зачудувачки раст на богатството значи дека милијардерите заработувале во просек по 1 милијарда долари дневно.
За споредба, просечниот американски работник во 2023 година заработувал нешто повеќе од 50.000 долари. Оксфам пресмета дека 10 просечни американски работници би морале да работат 726.000 години за да заработат иста сума.
Овие податоци дополнително ја истакнуваат длабоката економска нееднаквост во САД и доаѓаат во време кога републиканците во Конгресот дебатираат за скап закон кој, според независните експерти, дополнително би ги збогатил најбогатите, а во исто време би скратил речиси еден трилион долари од клучните социјални програми.
„Богатството на милијардерите расте со астрономска брзина, додека обичните луѓе се борат да врзат крај со крај“, вели Ребека Ридел, виш советник за економска и расна правда во „Оксфам Америка“.
Илон Маск заработил 186 милијарди долари
„Оксфам“ ги анализираше промените во богатството на десетте најбогати луѓе од листата на милијардери на „Форбс“ од крајот на април 2024 година до крајот на април 2025 година.
Илон Маск, најбогатиот човек во светот и извршен директор на Тесла, е одговорен за повеќе од половина од вкупниот раст – неговото богатство се зголеми за 186,1 милијарди долари. Претходните анализи покажаа дека Маск е на пат да стане првиот трилионер во светот, а неговата улога во политичкиот подем на Доналд Трамп го става во центарот на вниманието.
Нето вредноста на Марк Цукерберг и Роб Волтон (наследник на Волмарт) се зголеми за 38,7 милијарди долари секој. Ворен Бафет го зголеми своето богатство за 34,8 милијарди, а Џим Волтон за 36,5 милијарди долари. Некои милијардери, како што се коосновачите на Google, Лари Пејџ и Сергеј Брин, доживеаја пад на нивното богатство во овој период.
Оксфам предупредува дека новиот републикански закон, приоритет на Доналд Трамп, дополнително ќе ја влоши нееднаквоста.
„Сведоци сме на формирање на даночен систем што ќе доведе до појава на првиот трилионер“, рече Ридел.
Данок на богатство – решение или илузија?
Прогресивните политичари се залагаат за данок на богатството на ултрабогатите. Оксфам проценува дека данок од 3% на богатство над 1 милијарда долари само од десетте најбогати Американци би генерирал 50 милијарди долари – доволно за да се обезбеди годишна помош во храна за 22,5 милиони луѓе.
Сепак, спроведувањето на таков данок би било многу тешко, делумно затоа што е тешко прецизно да се процени нето вредноста, а некои правни експерти ја доведуваат во прашање уставноста на таквата мерка.