Централната банка на Русија во петокот одлучи да ја намали својата клучна каматна стапка за 100 базични поени на 20 проценти, што е прво намалување на стапката од септември 2022 година.
Клучната стапка моментално е на најниско ниво во последните девет месеци, бидејќи инфлацијата во Русија почна да се намалува, јавува агенцијата Анадолу.
„Тековните инфлациски притисоци, вклучително и базичната инфлација, продолжуваат да се намалуваат“, се вели во соопштението на банката.
Централната банка забележа дека иако растот на домашната побарувачка продолжува да ја надминува можноста за проширување на понудата на стоки и услуги, руската економија постепено се враќа на балансиран пат на раст.
Рестриктивната монетарна политика ќе се одржува сè додека не се достигне целта за инфлација во 2026 година, забележува банката.
„Понатамошните одлуки за клучната стапка ќе бидат донесени во зависност од брзината и одржливоста на падот на инфлацијата и инфлаторните очекувања. Според прогнозата на Банката на Русија, со оглед на ставот на монетарната политика, годишната инфлација ќе се врати на четири проценти во 2026 година и ќе остане во рамките на целта“, се вели во соопштението.
Руската централна банка ја зголеми референтната каматна стапка на 20 проценти веднаш по избувнувањето на војната меѓу Русија и Украина. Референтната каматна стапка остана на 16 проценти од крајот на 2023 година до крајот на јули 2024 година, со четири последователни зголемувања на каматните стапки во 2024 година. Банката последен пат ја зголеми референтната каматна стапка за 200 базични поени на 21 процент на 25 октомври 2024 година.
Иако годишната инфлација во земјата беше 10,2 проценти во април, банката има за цел да ја намали на четири проценти.