Европа би можела да стагнира доколку не се преземат итни мерки за справување со забавувањето на растот, слабите инвестиции и растечките геополитички закани, предупреди Меѓународниот монетарен фонд (ММФ), цитиран од „Bloomberg“.
Трговските тензии и слабата побарувачка го задушуваат моментумот, а економијата е во опасност од остар пад, соопшти фондот со седиште во Вашингтон. Се очекува еврозоната да порасне за само 0,8% во 2025-та година и покрај рекордно ниската невработеност и инфлацијата што е блиску до целта.
За да се оживее продуктивноста, ММФ повика на „одлучувачки поттик“ за долгоодложуваното продлабочување на единствениот пазар на ЕУ, додавајќи дека фрагментацијата преку границите ги задушува иновациите и растот на корпорациите.
Трошоците за компаниите од постојните бариери во рамките на ЕУ се еквивалентни на царина од 44% за стоки и 110% за услуги, соопшти ММФ. Елиминирањето на овие бариери преку хармонизација на регулативите, реформи на пазарот на капитал и мобилност на работната сила би можело да го зголеми бруто домашниот производ за 3% во текот на една деценија, додаде фондот.
Бидејќи трошоците за одбрана, стареењето на населението и климатските промени го зголемуваат вкупното трошење, земјите со фискален простор треба да инвестираат, но силно задолжените земји-членки се соочуваат со болна консолидација, соопшти ММФ. Тој повика на зголемување од 50% на буџетот на ЕУ за да се исполнат вкупните цели.
Фондот гледа ризици од влошување на деловната средина за компаниите со изложеност на САД, што би можело да влијае на билансите на банките. Но, го опиша европскиот банкарски систем како „соодветно капитализиран и ликвиден“ засега.
Во својата последна изјава по таканаречените консултации според Член IV, ММФ, исто така, предупреди дека небанкарските финансиски компании би можеле да ја загрозат финансиската стабилност.
Фото: Pixabay
