Цените на акциите пораснаа на Волстрит во понеделник, при што индексот Nasdaq достигна нов рекорден максимум, бидејќи инвеститорите се уверени дека американската централна банка наскоро ќе ги намали каматните стапки.
Дау Џонс доби 0,25 проценти, на 45.514 поени, додека S&P 500 порасна за 0,21 процент, на 6.495 поени, а индексот Nasdaq доби 0,45 проценти, на 21.798 поени.
Во шест од 11-те најважни сектори на индексот S&P 500, цените на акциите паднаа вчера, додека технолошкиот сектор порасна најмногу.
Новиот рекорд на индексот Nasdaq е најмногу благодарение на скокот на цената на акциите на Broadcom за повеќе од 3 проценти, откако производителот на чипови минатата недела објави дека очекува силен раст на приходите врз основа на развојот на вештачката интелигенција.
Со вчерашното зголемување на цената, пазарната вредност на Broadcom достигна 1,6 трилиони долари, што ја прави седма највредна компанија на Волстрит.
Така, индексите го продолжија својот позитивен тренд, кој трае со месеци, бидејќи инвеститорите очекуваат дека челниците на ФЕД ќе ги намалат каматните стапки за 0,25 процентни поени на нивната сесија во средината на септември.
Откако во петокот беа објавени слаби податоци од пазарот на трудот, кои укажуваат на забавување на економскиот раст, некои аналитичари очекуваат каматните стапки да се намалат за 0,50 процентни поени.
„Сите се фокусирани на намалување на каматната стапка следната среда. Пазарот е алчен. Намалувањето на каматната стапка од 0,25 процентни поени веќе е земено предвид. Сега некои купуваат затоа што очекуваат намалување од 0,50 процентни поени, но тоа нема да се случи“, рече Џејк Долархајд, директор во „Лонгбоу асет менаџмент“.
Цените на акциите исто така пораснаа на европските берзи вчера, иако францускиот парламент изрази недоверба во владата, поради што сега претседателот Емануел Макрон мора да најде нов премиер, веќе петти за помалку од две години.
Лондонскиот индекс FTSE доби 0,14 проценти, на 9.221 поен, додека франкфуртскиот DAX порасна за 0,89 проценти, на 23.807 поени, а парискиот CAC за 0,78 проценти, на 7.734 поени.