Кинеската влада постави цел од 4,5% до 5% раст на бруто домашниот производ за 2026 година, што претставува најнизок планиран економски раст од почетокот на 1990-тите. Како што објавува Асошиејтед Прес, Пекинг се соочува со низа предизвици: послаба домашна потрошувачка, продолжена криза на пазарот на недвижности и растечки геополитички притисоци.
Во исто време, кинеските власти се обидуваат да ја насочат економијата кон високотехнолошките сектори. Земјата ги зголемува инвестициите во вештачка интелигенција, производство на чипови и индустриска независност, настојувајќи да ја намали зависноста од странски технологии и да го стабилизира долгорочниот раст.
Економистите предупредуваат дека кинеската економија влегува во нова фаза на побавен, но постабилен развој, по децении двоцифрени стапки на раст.
Индија останува најбрзо растечката голема економија
За разлика од Кина, Индија продолжува да доживува економски раст. Според проценките на меѓународните економски институции и аналитичарите, индиската економија расте со стапка од околу 7% оваа година, што останува најбрзо растечката голема економија во светот.
Според „Тајмс оф Индија“, големиот раст е поттикнат од домашната потрошувачка, технолошкиот сектор и инвестициите во инфраструктурата. Во последниве години, Индија привлече голем број глобални компании кои го преместуваат производството од Кина, како дел од стратегијата за диверзификација на синџирите на снабдување, според индиските медиуми.
Сепак, аналитичарите предупредуваат дека индиската економија не е целосно имуна на глобалните ризици. Зголемувањето на цените на енергијата и геополитичките тензии на Блискиот Исток би можеле да претставуваат предизвик за земјата што увезува голем дел од својата нафта од регионот.
Нова економска динамика во Азија
Разликите во стапките на раст на двете азиски сили сè повеќе ја обликуваат глобалната економска слика. Додека Кина се обидува да ја стабилизира економијата и да премине на модел на раст базиран на технологија и иновации, Индија го користи демографскиот раст и дигиталната трансформација за да го забрза развојот.
Економистите проценуваат дека односот меѓу овие две економии во следната деценија во голема мера ќе го одреди идниот баланс на глобалната економија. Кина сè уште останува втора најголема економија во светот, но Индија побрзо го затвора јазот во развојот и ја зајакнува својата улога на меѓународната економска сцена.