Во понеделник, тргувањето на Волстрит започна со остар пад на берзанските индекси, но подоцна тие пробија на позитивна територија бидејќи американскиот претседател Доналд Трамп изјави дека војната со Иран може наскоро да заврши.
Dow Jones доби 0,50 проценти, на 47.740 поени, додека S&P 500 порасна за 0,83 проценти, на 6.795 поени, а индексот Nasdaq порасна за 1,38 проценти, на 22.695 поени.
Поради силниот раст на цените на нафтата, кои пробија далеку над нивото од 100 долари за барел, сите светски берзи вчера нагло паднаа бидејќи зголемувањето на цените на горивата може да ја стимулира инфлацијата и да ѝ наштети на целата светска економија.
Hа Волстрит, тргувањето започна со остар пад на берзанските индекси, па затоа беа во минус за повеќе од 1 процент.
Сепак, откако Трамп изјави дека американско-израелската војна против Иран е „скоро“ завршена и дека може да трае помалку од проценетото, во последниот час од тргувањето, индексите на берзата ги надоместија сите загуби и го завршија денот на позитивна територија.
„Таквиот пресврт во движењата на цените покажува дека инвеститорите бараат каква било можност да се вратат на берзата. Сепак, на пазарот сè уште постои голема неизвесност во врска со времетраењето на конфликтот, како и колку долго ќе биде затворен Ормутскиот теснец“, вели Сем Стовал, стратег во CFRA Research.
Бидејќи Иран изјави дека нема да дозволи танкери да поминат низ тој премин, што го запре извозот на нафта од Блискиот Исток, рано наутро во понеделник цените на нафтата скокнаа за повеќе од 25 проценти, приближувајќи се до нивото од 120 долари за барел.
Сепак, подоцна паднаа бидејќи Трамп се закани со уште посилни напади врз Иран ако не дозволи премин низ тој теснец. Покрај тоа, медиумите пишуваат дека Белата куќа размислува за ублажување на санкциите против Русија со цел да се зголеми понудата на нафта на светските пазари.
Благодарение на сето ова, цените на акциите вчера пораснаа во девет од 11-те најважни сектори на индексот S&P 500, а најмногу во технологијата.
Сепак, неизвесно тргување на светските берзи се очекува и во наредните денови.
И на европските берзи, цените на акциите вчера паднаа. Лондонскиот индекс FTSE ослабе за 0,34 проценти, на 10.249 поени, додека Франкфуртскиот DAX се лизна за 0,77 проценти, на 23.409 поени, а парискиот CAC за 0,98 проценти, на 7.915 поени.