Во 2025 година, Европската Унија извезе стоки во Австралија во вредност од 36,9 милијарди евра и увезе 10,2 милијарди евра, што резултираше со трговски суфицит од 26,7 милијарди евра.
Извозот се намали за 4,9 проценти во споредба со 2024 година, но се зголеми за 39,6 проценти во споредба со 2015 година. Слично на тоа, увозот се намали за 4,8 проценти во споредба со 2024 година и се зголеми за 49,9 проценти во споредба со 2015 година, според Европската канцеларија за статистика – Евростат.
Петте најизвезувани групи производи, категоризирани според Стандардната класификација на меѓународната трговија, учествуваа со 47,3 проценти од вкупната вредност на стоките извезени во Австралија.
Тоа беа лекови и фармацевтски производи (13,1 проценти), друмски возила (11,1 проценти), општи индустриски машини и опрема (9,5 проценти), електрични машини, апарати и електрични делови (6,9 проценти) и машини специјализирани за одредени индустрии (6,7 проценти).
Петте најголеми увози учествуваа со 62,1 процент од вредноста на сите увезени производи. Јагленот, коксот и брикетите учествуваа со 29 проценти од вкупниот увоз, по што следуваат маслодајни семиња и овошје (15,3 проценти), злато (7,2 проценти), метални руди и метален отпад (5,6 проценти) и разни готови производи (пет проценти).
Австралија и Европската унија во вторник потпишаа осумгодишен трговски договор со кој се елиминираат царините за речиси сите европски стоки, како и за поголемиот дел од австралискиот извоз на клучни минерали.