Германскиот концерн „Хенкел“ денес објави дека го купува американскиот бренд за нега на коса „Олаплекс“ за околу 1,4 милијарди долари (1,21 милијарди евра), како дел од стратегијата за зајакнување на својот бизнис во сегментот на убавина.
Компанијата од Дизелдорф нуди 2,06 долари по акција, а планирано е да го повлече „Олаплекс“ од берзата по завршувањето на трансакцијата, која сè уште чека регулаторни одобренија, објавува „Билд“.
Со овој потег, Хенкел ја забрзува својата деловна трансформација, префрлајќи го фокусот од традиционалните производи за широка потрошувачка кон попрофитабилни сегменти со поголема додадена вредност.
Олаплекс се смета за премиум бренд, со силно присуство во фризерските салони и онлајн малопродажбата.
Производите на американската компанија се потпираат на научно засновани формули, што има своја цена: шампон од 250 милилитри може да чини дури 32 евра.
Во 2025 година, Олаплекс оствари приход од околу 370 милиони евра со висока профитабилност, што го прави привлечна цел за аквизиција.
Извршниот директор на Хенкел, Карстен Кнобел, изјави дека аквизицијата ќе овозможи понатамошен раст и иновации во сегментот за нега на коса, со фокус на премиум производи.
Хенкел е познат на пошироката јавност по брендови како што се Персил и Шварцкопф, а со оваа аквизиција покажува дека сака поголемо присуство на пазарот на Соединетите Американски Држави.