Владините мерки за стабилизирање на цените и заштита на животниот стандард на граѓаните даваат позитивни резултати, истакна министерот за економија Бесар Дурмиши.
Министерот подвлече дека светските пазарни турбуленции неизбежно влијаат врз домашната економија. Сепак, државата навремено интервенираше со намалување на стапката на ДДВ за нафтата од 18 на 10 проценти, а истовремено континуирано ги следи цените на прехранбените производи.
Тој потенцира дека земјава и натаму располага со едни од најприфатливите цени на нафтените деривати во регионот. Како земја со значителна увозна зависност, таа е особено ранлива на надворешни ценовни шокови.
За да се спречат потенцијални злоупотреби од страна на трговците, Дурмиши информираше дека Државниот пазарен инспекторат има ангажирано 30 мобилни екипи кои вршат засилен надзор на целиот снабдувачки синџир, од производители до малопродажници.
„Досега не се евидентирани драстични зголемувања на цените. Испраќаме недвосмислена порака дека нема да има толеранција за неоправдано покачување на цените или маржите на профит“, нагласи министерот.
Тој додаде дека инфлаторните притисоци во последниве два месеци опаѓаат, што според него, укажува на стабилизација на економските процеси. „Не тврдам дека состојбата е идеална, но факт е дека во краток период успеавме да обезбедиме стабилност и предуслови за натамошен напредок. Нема да дозволиме кризата да биде злоупотребена на штета на граѓаните“, порача Дурмиши.