Инфлацијата во Германија нагло се забрза во март, со остар скок на цените на енергијата, покажаа прелиминарните пресметки на статистичкиот завод во понеделник.
Потрошувачките цени се зголемија во март за 2,7 проценти во споредба со истиот месец минатата година, пресметаа статистичарите.
Така, во првиот месец од пролетта, цените пораснаа најсилно од почетокот на 2024 година, според податоците на Дестатис.
Енергијата беше дури 7,2 проценти поскапа во март отколку пред една година, што сигнализира најсилен раст на цените од август 2023 година и крај на двегодишен „поевтин“ период.
Кога ќе се исклучат храната и енергијата, инфлацијата беше 2,5 проценти во март, како и во првите два месеци од оваа година.
Храната беше поскапа за 0,9 проценти, а услугите за 3,2 проценти.
Месечната споредба покажува скок на потрошувачките цени во март за 1,1 процент. Во февруари тие се зголемија за 0,2 проценти.
Хармонизираниот индекс на потрошувачки цени (HICP), кој овозможува споредба меѓу членките на ЕУ, покажува зголемување на цените од 2,8 проценти во март во споредба со истиот месец минатата година. Во февруари тие беа повисоки за 2,0 проценти.
На месечно ниво, цените мерени според HICP се зголемија за 1,2 проценти во март, покажуваат прелиминарните пресметки на Дестатис, три пати посилно отколку во февруари.