Во првиот квартал од оваа година, Русија извезе повеќе течен природен гас отколку во истиот период минатата година, а испораките во Европа се зголемија и покрај најавата на Москва дека ќе ги пренасочи кон други пазари.
Прелиминарните податоци од трговската платформа LSEG (London Stock Exchange Group) покажуваат дека во првите три месеци, Русија извезла 8,9 проценти повеќе LNG, достигнувајќи обем од 8,6 милиони тони.
Американските санкции против Русија поради Украина доведоа до намалување на рускиот извоз на течен природен гас (ТПГ), особено од производствениот погон „Арктик ЛНГ 2“, поради тешкотии во наоѓањето купувачи. Сепак, од јануари до март, таа фабрика испорача 800 илјади тони течен природен гас (ТПГ), што придонесе за зголемување на вкупните руски испораки.
Само во март, рускиот извоз на ТПГ на годишно ниво се зголеми за 13,9 проценти на 3,04 милиони тони.
Податоците покажуваат дека извозот во Европа за три месеци бил поголем за 17 проценти, достигнувајќи 4,8 милиони тони. Ако го погледнеме само март, тогаш зголемувањето е од 1,33 милиони тони во истиот месец минатата година на 1,7 милиони тони.
Сето ова се случува во време кога Европската Унија (ЕУ) донесе одлука за забрана на увоз на руски гас преку гасоводи, што треба целосно да се спроведе до крајот на следната година, а исто така и за забрана на нови краткорочни договори за увоз на ТПГ, што ќе стапи на сила на крајот на овој месец.
Одговорот на рускиот претседател Владимир Путин на тие потези беше дека ќе го пренасочи гасот кон други пазари, но очигледно е дека тоа досега не е направено, со оглед на тоа што пласманот во Европа сè уште носи приход.