Цените на нафтата скокнаа на 109 долари во Лондон утрово, а барелот на американскиот пазар чини 111,5 долари.
Кон крајот на неделата, пазарите беа вознемирени од изјавите на американскиот претседател Доналд Трамп за војната против Иран.
Во својот говор пред американските граѓани, Трамп најави „исклучително жестоки“ напади врз Иран во следните две до три недели, што укажува дека иранските електрани исто така ќе бидат цел.
Иран веќе објави дека ќе одговори на нападите со иста мера, а негови цели ќе бидат енергетските капацитети во други земји долж Персискиот Залив. Техеран, исто така, ја презеде контролата врз Ормутскиот теснец поради нападите на САД и Израел, забранувајќи го транзитот на бродови поврзани со САД, Израел и нивните сојузници.
Ормутскиот теснец ќе се отвори „сам“ кога ќе заврши војната, тврди Трамп, без да даде специфики или временска рамка за таков развој.
Европа може да купи гориво од САД или може самата да го отвори Ормутскиот теснец, повтори американскиот претседател, незадоволен што европските земји одбија да учествуваат во војната против Иран.
Азија досега најмногу страдаше од прекините во снабдувањето со енергија од Блискиот Исток, а Европа би можела да доживее недостиг на дизел и гориво за авиони најдоцна во мај, предупреди шефот на Меѓународната агенција за енергија (ИЕА) Фатих Бирол во подкаст во четврток.
