Владата, на вчерашната вонредна седница, донесе одлука за продолжување на мерките за ублажување на ценовните притисоци и заштита на животниот стандард на граѓаните. Рокот за примена на овие олеснувања сега е продолжен до 1 јуни 2026 година.
Веста на својот Фејсбук профил ја објави министерката за финансии, Гордана Димитриеска Кочоска, посочувајќи дека ова е неопходен чекор во време на економски предизвици и нестабилност на меѓународните пазари на енергенси.
“Мерките насочени кон ублажување на ценовните притисоци и заштита на животниот стандард на граѓаните продолжуваат со примена до 1 јуни 2026 година. Овие мерки претставуваат адекватен одговор на економските предизвици и неизвесностите со кои се соочуваат сите држави на меѓународните пазари на енергенси,” напиша Димитриеска Кочоска на Фејсбук.
Претходната владина одлука за намалување на акцизите на горивата и на ДДВ-то за бензините од 18 на 10 отсто истекува во понеделник, 18-ти мај. Со продолжувањето на рокот, горивата ќе се продаваат по пониски цени во следните две недели.