Растот на берзите значително го зголеми бројот на милионери во долари низ целиот свет. Минатата година, 25,3 милиони луѓе имале инвестициски средства од најмалку еден милион долари, според анализата на консултантската фирма „Капџемини“, пренесува германската новинска агенција (ДПА).
Силниот раст на берзите создаде рекорден број нови милионери
Тоа е речиси два милиони повеќе отколку во 2024 година.
Во Германија, во оваа група имало околу 1,78 милиони луѓе во 2025 година, што е за 11,1 проценти повеќе отколку една година претходно.
Богатството на германските милионери се зголемило за 12,7 проценти на повеќе од 7,1 милијарди долари, или околу 6,1 милијарди евра. Земјата, исто така, имала корист од намалувањето на инфлацијата.
Ова ја става Германија на третото место во меѓународна споредба.
Соединетите Американски Држави остануваат на првото место, со 736.000 милионери повеќе минатата година, или 8,7 милиони. САД, според тоа, имале најголем раст во светот.
Јапонија, исто така, забележа значителен раст на второто место со 436.000 нови милионери, како и Кина на четвртото место со дополнителни 154.000.
Заедно, четирите земји со најмногу милионери, САД, Јапонија, Германија и Кина, сочинуваат речиси две третини од сите милионери во светот, или 65,7 проценти.
Богатството на најбогатите луѓе во светот порасна повеќе од кога било за една година.
Вкупните глобални средства се зголемија за 8,7 проценти и достигнаа рекордни 98,3 трилиони долари, или приближно 84,4 трилиони евра.
Во исто време, бројот на ултрабогати луѓе со средства за инвестирање од најмалку 30 милиони долари порасна најбрзо на глобално ниво, со стапка од 9,4 проценти.
Во својот годишен извештај за богатството, кој се објавува од 1997 година, „Капџемини“ ги зема предвид акциите, обврзниците, алтернативните инвестиции како што се приватниот капитал, готовината, како и нерезиденцијалните недвижности.
Уметничките колекции и стоките за широка потрошувачка како што се автомобилите и накитот не се земаат предвид.
Студијата се базира на повеќекратни анкети на 6.510 лица со висока нето вредност од 27 пазари, 144 директори на фирми за управување со богатство и 1.317 советници за клиенти.