Водечките светски централни банкари на годишниот форум на Европската централна банка (ЕЦБ) во Синтра, Португалија, оценија дека новиот претседател на Федералните резерви на САД (ФЕД), Кевин Ворш, би можел да биде важен партнер во зачувувањето на меѓународната соработка меѓу централните банки.
Во својот прв меѓународен настап откако ја презеде функцијата, Ворш рече дека ФЕД ќе остане посветен на независноста на централната банка и нејзината основна цел за одржување на ценовната стабилност, обидувајќи се да ги смири загриженостите дека монетарната политика на САД би можела да стане поподложна на политичко влијание, објави Ројтерс.
На панел со претседателката на Европската централна банка, Кристин Лагард, и други гувернери, Ворш ја нагласи важноста на меѓународната соработка и се залагаше за поедноставна комуникација меѓу централните банки и јавноста, што беше во согласност со главната тема на овогодинешниот собир посветен на враќањето на основните принципи на монетарната политика.
