🎥Норвешка авиокомпанија направи фантастичен маркетиншки потег:Изгубија облог, но го освоија интернетот

Норвешка авиокомпанија направи потег кој веќе се нарекува една од најуспешните маркетиншки кампањи на ова Светско првенство во фудбал, и тоа без голем буџет.

Сè започна со едноставен предизвик на социјалните мрежи. Пред натпреварот меѓу Норвешка и Англија, „Норвиџан“ му предложи необичен облог на „Бритиш ервејс“ – репрезентацијата на земјата која ќе изгуби, ќе мора на еден ден да го замени логото на авиокомпанијата на својот инстаграм-профил со логото на ривалот.

„Бритиш ервејс“ го прифати предизвикот, а нивната хумористична размена на пораки брзо го привлече вниманието на јавноста. Во приказната се вклучија и други брендови, со што обичната објава на Инстаграм прерасна во голем маркетиншки момент.

Иако Норвешка не мораше да победи за да ја оствари целта, токму подготвеноста на ризик беше клучот за успехот на кампањата. Брендот креираше ситуација во која можеше да добие внимание без оглед на исходот од натпреварот.

Најголемата вредност на овој потег беше во приказната што „Норвиџан“ успеа да ја создаде. Наместо класично рекламирање и големи инвестиции, компанијата ѝ понуди на публиката забавен момент што луѓето самите сакаа да го споделуваат.

Додека компаниите често трошат милиони за да добијат неколку секунди внимание за време на големите спортски настани, „Норвиџан“ покажа дека креативноста, храброста и доброто чувство за момент понекогаш вредат повеќе од големиот буџет.